အမေရိကန်သမ္မတ ဒေါ်နယ်ထရမ့် (Donald Trump) နဲ့ ဆွေးနွေးဖို့ ရုရှား သမ္မတ ဗလာဒီမီယာပူတင် (Vladimir Putin) ဘက်ကအသင့်ပဲလို့ ရုရှားသမ္မတရုံးက ဒီနေ့ ပြောကြားလိုက်ပါတယ်။
အမေရိကန်ဘက်က ဆွေးနွေးမယ်လို့ အချက်ပြတာကို စောင့်နေတယ်လို့ ရုရှားသမ္မတရုံးပြောခွင့်ရ Dimitry Peskov က ပြောကြားခဲ့တာပါ။ ယူကရိန်းစစ်ပွဲအရေးဆွေးနွေးဖို့ အသင့်ပဲလို့ သမ္မတပူတင်ရော အမေရိကန်သမ္မတသစ်ထရမ့်ပါ နှစ်ဘက်လုံးကပြောနေကြတာဖြစ်ပါတယ်။ ဘယ်တော့တွေ့ကြမှာလဲဆိုတာနဲ့ပတ်သက်လို့တော့ မမြင်နိုင်တဲ့အနာဂတ်ကို ကြိုပြောဖို့ခက်တယ်လို့ ရုရှားသမ္မတရုံးပြောခွင့်ရ Dimitry Peskov က ပြောကြားခဲ့ပါတယ်။
ယူကရိန်းကို ရုရှားစစ်တိုက်နေတာ ရပ်ဖို့သဘောမတူရင် ပိုမိုပြင်းထန်တဲ့ စီးပွားရေးပိတ်ဆို့မှုတွေ ခံရမယ်လို့လည်း သမ္မတထရမ့်က ခြိမ်းခြောက်ထားပါတယ်။ ရုရှားရောင်းနေတဲ့ လောင်စာဆီတွေကို လျှော့ချလိုက်ရင် ယူကရိန်းစစ်ပွဲ အဆုံးသတ်သွားလိမ့်မယ်လို့ သမ္မတထရမ့် ပြောတာကိုတော့ ရုရှားသမ္မတရုံးက ပယ်ချပြီး ပဋိပက္ခက လောင်စာဆီဈေးပေါ် မူတည်နေတာမဟုတ်ဘူးလို့ တုံ့ပြန်ခဲ့ပါတယ်။
ဆွစ်ဇာလန်နိုင်ငံ Davos မှာကျင်းပနေတဲ့ ကမ္ဘာ့စီးပွားရေးညီလာခံကြီးမှာ အမေရိကန်သမ္မတထရမ့်က ဆီဈေးကျရင် ရုရှား-ယူကရိန်းစစ် အဆုံးသတ်နိုင်တာမို့ ဆော်ဒီအာရေးဗီးယားနဲ့ OPEC ကမ္ဘာ့ရေနံတင်ပို့မှုနိုင်ငံများအဖွဲ့ကို တောင်းဆိုသွားမယ်လို့လည်း ကြာသပတေးနေ့က ပြောကြားခဲ့ပါတယ်။
Your browser doesn’t support HTML5
သမ္မတထရမ့်နဲ့ ဆွေးနွေးဖို့အသင့်ပဲလို့ ရုရှားတုံ့ပြန်